أشرف إمام ينتقد أخطاء معتمد جمال الفنية ويتحدث عن حظوظ الزمالك في الدوري

أشرف إمام: أخطاء فنية تهدد مسيرة الزمالك في الدوري

صرّح أشرف إمام، نجل النجم السابق حمادة إمام، بأن الجهاز الفني للزمالك وقع في عدد من الأخطاء الفنية الواضحة، مؤكداً أنه لا يستطيع في الوقت الراهن الحسم بقدرة الفريق الأبيض على حصد لقب الدوري للمرة الثانية هذا الموسم.

«لسه مش قادر أقول آه»

وخلال مداخلة تلفزيونية مع الإعلامي هاني حتحوت، قال أشرف إمام: «لغاية دلوقتي فيه حتة كده جوايا مش قادر أقولك آه؛ لأن فيه بعض الأخطاء الفنية العنيفة جداً اللي حاصلة من الجهاز الفني لنادي الزمالك. لازم أشوف الأول أمارة، وبعد كده أقولك».

تمركز خاطئ يخلق مساحات فارغة

وأشار إلى أن أبرز هذه الأخطاء تتعلق بتمركز لاعبي الزمالك داخل الملعب، موضحاً: «الزمالك بيلعب بلوك قدام فرق ضعيفة جداً، من غير ذكر أسامي، تلاقي الونش ومحمد إسماعيل واقفين عند مهدي سليمان، فده بيعمل إيه؟ بيبقى فيه مساحات كبيرة جداً ما بين التلات خطوط».

وأضاف: «كل الفرق اللي أنت لعبتها بقت تضغط عليك وتعمل هاي بريس عليك، وإنت واقف ورا. أنا ما أعرفش إنت بتقف ورا ليه؟ دي من الحاجات الغريبة».

انتقاد إدارة ملف اللاعبين الشباب

ووجّه أشرف إمام انتقاده لغياب القرارات الحاسمة تجاه بعض اللاعبين الشباب الذين غادروا الزمالك، قائلاً: «فكرة إن كابتن معتمد جمال ما تدخلش في الوقت المناسب للاستغناء عن اللعيبة الناشئين اللي مشيت، زي أنس وائل، وإنت عندك مشكلة في الوينج رايت، كان المفروض تاخد موقف قوي جداً، وما تسيبش اللعيبة دي تهرب من إيدك».

«مفيش تفكير خارج الصندوق»

كما هاجم الاعتماد على أسلوب تكتيكي واحد دون مراعاة طبيعة كل مباراة، قائلاً: «فكرة إن أنا ما بعملش حاجة خارج الصندوق، وما بفكرش خارج الصندوق، فكرة غريبة جداً».

وتابع مستنكراً: «في ماتش مع بطل جيبوتي، وكاسب أربعة، وبلعب 3-2-5، ومحمد شحاتة وينج ليفت، فكرة مش قادر أصدقها لغاية دلوقتي».

تشكيل مثير للدهشة أمام بطل جيبوتي

وشرح رؤيته لما حدث، قائلاً: «الزناري لعب، والونش لعب، ومحمد إسماعيل؛ أدي تلاتة. وباك شمال عمر جابر، اللي هو مش باك شمال، وباك يمين محمد إبراهيم؛ أدي خمسة. بلعب في نص الملعب بجهاد وأحمد ربيع؛ أدي اتنين، وقدام تلاتة، منهم وينج ليفت محمد شحاتة».

واختتم: «إزاي نادي الزمالك يعمل كده وهو لاعب فرقة كاسبها أربعة؟ إيه الناحية الفنية يا كابتن معتمد؟ مينفعش يا حبيبي، مينفعش. نادي الزمالك فرقة كبيرة جداً».

جانب إيجابي: صفقات جون إدوارد

ورغم انتقاداته، أقرّ أشرف إمام بوجود عوامل إيجابية داخل الفريق، خاصة بعد التدعيمات التي أجراها جون إدوارد المدير الرياضي، قائلاً: «عندي ميزة من الحاجات اللي عملها جون إدوارد، زي ما قلت لك: جاب كبشة لعيبة».